சிறுகதை முதல் நாவல் வரை: சுனில் கிருஷ்ணன் பகிர்ந்த சிந்தனைகள்

கதை என்பது என்ன?: ஒரு இலக்கிய சந்திப்பின் சுவடுகள்

ஒரு உணவக உரிமையாளர் தன்னுடைய கடைக்கு Seven Bells என்று பெயரிட்டு, வாசலில் 6 மணிகளை தொங்க விட்டிருந்தார். தவறு கண்டுபிடிப்பதில் ஆர்வமாக உள்ள மக்கள், உள்ளே வரும் போது, அவர்களை வாடிக்கையாளர்களாக்கி வெற்றி பெற்ற Seven Bells (ஏழு மணிகள்) என்ற கதையை சுனில் கிருஷ்ணன் முதலில் கூறினார்.

இந்த நிகழ்வுக்கான போஸ்டரில் இருந்த தேதி குளறுபடியால், இன்னும் அதிக பேருக்கு சென்றடைந்திருக்கும் என்பதை இந்த கதையுடன் இணைத்து வேடிக்கையாக அமர்வை தொடங்கினார்.

நந்தி கூடுகை மஹேந்திரன், சுனில் அவர்களை பற்றிய அறிமுகம் கொடுத்தார். ஆயுர்வேத மருத்துவர், எழுத்தாளர் மற்றும் காந்திய வாதி என்ற அவரின் மூன்று முகங்களை பற்றி விரிவாக கூறினார்.

அதன் பின் சுனில் கிருஷ்ணன் அவர்களின் அமர்வு தொடங்கியது.

சிறுகதை வாசிக்கும் போது கவனத்தில் கொள்ள வேண்டியவை எவை?

1. யார் கதைசொல்லி?

கதை யார் பார்வையில் இருந்து கூறப்படுகிறது.

2. தலைப்பு

ஆசிரியரின் நோக்கம் (Author's Intent) தலைப்பில் இருப்பதால், அதை கவனிக்க வேண்டியது அவசியம். கதையை புரிந்து கொள்ள Hint ம் இருக்கும். உதாரணமாக நமக்கு நன்கு தெரிந்த முயல் - ஆமை ஓட்ட போட்டி கதைக்கு 'வெற்றி/ தோல்வி / களிப்பு ' என்று வெவ்வேறு தலைப்பிற்கு ஏற்ற வாறு கதையை புரிந்து கொள்வது மாறுபடும்.

3. உரையாடல்

யுவன் அவர்களின் கதைகளில் உள்ள உரையாடல்கள் தனித்தன்மை கொண்டவை. ஜெ வின் ஆனையில்லா தொகுப்பில் உள்ள வட்டார வழக்கு.

4. வாசக இடைவெளி

கதையில் வாசகன் இட்டு நிரப்ப இயல்பான இடைவெளி இருக்கும். நேர்மையாக(sincere) வாசிப்பது போதுமானது. நமக்கு கிடைப்பதை வைத்து புரிதலை மேம்படுத்தி கொள்ளலாம்.

5. விவரணை

வளவளவென்று இல்லாமல், புற விவரணை அகத்தில் நடப்பதற்கான குறியீடாக இருக்க வேண்டும். உதாரணமாக Raymond Carver எழுதிய A Small, Good Thing கதையில், மருத்துவமனையின் விவரணை அந்த சிறுவனின் நிலையை காட்டுவதாக, வாசகனை பதட்டம் அடைய செய்வதாக உள்ளது.

6. சொற்சிக்கனம்

ஒரு கதையில் ஒரு வரியை எடுத்தால் கூட கதை மாற கூடிய அளவு சொற்சிக்கனம். கதை எப்போது சிறுகதையாக மாறும்?

1. முடிவில் இருந்து தொடங்கும். உதாரணமாக குருதிசோறு, வண்ணம்.
2. அளவில் சிறிய கதை . குறுங்கதைக்கும் குறுநாவலுக்கும் இடைப்பட்ட அளவில் இருக்கும். விதிவிலக்காக வண்ணநிலவனின் மிருகம், பாம்பும் பிடாரனும், Alessandro Baricco வின் பட்டு போன்ற கதைகள் அளவில் சிறிதாக இருந்தாலும் சிறந்த சிறுகதைகள்.
3. ஒரே காலகட்டம் விதிவிலக்காக குருதிசோறு, 1971 போன்ற கதைகள்.
4. ஒரே குரலில் இருப்பது. விதிவிலக்கு ராமேஷ் பிரேதன் கதைகள்.

முக்கியமாக கவனிக்க வேண்டியது இவ்வனைத்து விதிகளையும் உடைத்து போட ஒரு சிறந்த கலைஞரால் முடியும்.

புதுமைப்பித்தன், ப. சிங்காரம், பிரமிள் போன்றவர்கள். அதனால் முன்முடிவுகள் இல்லாமல் ஒரு படைப்பை அணுகுவது அவசியம்.

நாவலுக்கும் சிறுகதைக்கும் உள்ள வேறுபாடு என்ன?

சிறுகதையில் ஒரு மையக்கேள்வி இருக்கும். நாவலில் ஒரு மையக்கேள்வியும், பல துணை கேள்விகளும் இருக்கும். (காவிய முகாமில் கோபாலகிருஷ்ணன் அவர்களின் ஆய்வும் புனைவும் அமர்வின் கேள்வி பதிலில் ஜெ இதை கூறினார். ஒரு vision இல் இருந்து தான் நாவல் தொடங்கும். அதன் பேசு பொருளுக்கு ஏற்றவாறு அது சரித்திர நாவலாகவோ, அல்லது அறிவியல் புனைவாகவோ அல்லது வேறு genre ஆகலாம்.)

மேலும் நாவலின் நாயகன் 'காலம்' . உதாரணமாக விஷ்ணுபுரம் நாவல். சிறுகதை வாசிக்கும் போது அதன் மையக் கேள்வியை கண்டு கொள்ள வேண்டும். அதன் பின் அதன் அழகியலை ரசிக்கலாம்.

முற்போக்கு அழகியலில் மையம் மனிதனாக உள்ளது. அவனை பின்னோக்கி இழுக்கும் சக்தி என்ன? எல்லா கதைகளும் மனிதனின் அடிப்படை பிரச்சினைகளை பற்றி பேசுகிறது. 'Men at Work' பதாகை போல இலக்கியவாதிகள் வழி காட்டுவார்கள். அதன் கருத்தை நாம் எடுப்பது தேவையில்லை.

உதாரணமாக வண்ணம் கதையில், அரசன் குடிகளை மதிக்க வேண்டும் என்று எடுக்க தேவையில்லை. அது அனைவருக்கும் தெரிந்த விஷயம். கருத்தை தாண்டி , எவ்வாறு அந்த பிரச்சினை கூறப்பட்டுள்ளது என்பதை கவனிக்க வேண்டும். சிறுகதையை அதன் செய்தியை கொண்டே மதிப்பிட வேண்டும்.

ஒரே தருணத்தை குறுங்கதை, அதை விரித்து சிறுகதை, இன்னும் விரித்து நாவல் என்று உருவாக்க முடியும்.

அதன் பின் கேள்விகளுக்கு பதிலளிக்கப்பட்டது. நன்றியுரையுடன் அமர்வு முடிந்தது. வாசிப்பை எவ்வாறு அணுக வேண்டும் என்ற தெளிவான பார்வையை கொடுத்த சுனில் கிருஷ்ணன் அவர்களுக்கு நன்றி.

-- ராஜேஸ்வரி, கோவை